For my loving parents...
(on their 25th wedding anniversary)
April 19th, 2009
Ishwar ki di deh ko insaan banaya aapne,
Hamaare saath apna ek chhota sansaar sajaaya aapne,
Jeevan diya aapne, jeena sikhaya aapne,
Kaise insaan bane khubsoorat nageena, sikhaya aapne,
Khud jitni bhi mushkilein ho, aap sadaa muskuraate rahe,
Hamein har khushi ko khushi se baantna sikhaya aapne,
Kitna pyar aap karte hain hum sab se,
Hamein insaaniyat se pyar karna sikhaya aapne,
Aapne apne jeevan me koi jashn na manaaya,
Hamein jeevan ka jashn manaana sikhaya aapne,
Kitne pal nyochhavar kiye, aapne din-raat hamaare liye,
Hamein aasmaan ki bulandiyaan chhuna sikhana aapne,
Aapne apne sapne hamaari aankhon me dekhe,
Sapne hakeekat karne ki himmat, jutaana sikhaya aapne,
Aapko kuch kah sakein hum, itne to shabda bhi nahi,
Apni bhavnayein vyakta karna sikhaya aapne,
Aaj hum jo bhi hain, bas aapki duayein hain,
Yoon garva se seena uthana, bhi sikhaya aapne,
Jeevan diya aapne, jeena sikhaya aapne...
