Ho gayi hai shaam...

Arey, ye kya hua

Ye andhera, ye jaam,

Kya sach me din dhal gaya,

Kya ho gayi hai shaam?

Abhi-abhi to subah thi,

Main neend se tha jaaga,

Kuch sapne the, jo karne the poore,

Main peechhe tha unke bhaaga.

Abhi-abhi to bas pakdi thi,

Jo ghumaati mujhe sansaar,

Abhi-abhi to kadam rakha tha,

Zindagi me pahli baar.

Abhi hi to pahchaana tha,

Kya jhooth hai, kya sachchai,

Abhi-abhi to jana tha,

Kya hai rishton ko gahraayi.

Abhi-abhi to anjaane bhi

Dost banaye the,

Na jaane unke saath,

Kitne jashna manaaye the.

Abhi-abhi to seekha tha,

Banana naye naye plan,

Aur karna apni jeet ka,

Poori duniya me elaan.

Seekha tha humne jeetna,

Par seekhi bhi thi haar,

Seekha tha roothna-manaana,

Seekhi thi takraar.

Wo dosto ki mahfil,

Wo chhoti si baat,

Kuch kah di, kuch rah gayi,

Aur ho gayi raat.

Pata na chalaa tha,

Ki dhal chuka hai din,

Aur rah gayi hai sirf,

Ye raat taare gin.

Guzaar diya waqt,

Na jaane kya paane ki chaah me,

Par kho gaye hum kahin,

Us manzil ki hi raah me.

Kaise jaaye wapas,

Koi to pataa do,

Kya ye jashna ke hain jaam

Mujhe koi to bataa do?

Koi to raah dhoondhni hi padegi,

Kal subah fir jaagna hai.

Ek naye sapne ke peechhe,

Kal subah fir bhaagna hai.

Aaj to jo hua, so hua,

Abhi karte hain aaraam,

Kal fir subah aayegi,

Abhi ho gayi hai shaam.