Zindagi aur Khwaab

Zindagi aur Khwaab, sab ek nahin hote,

Zindagi to sach hai aur khwaab fasaana.

Zindagi bahut kasi huyi hai

Dard se, bandhanon se,

Ansuljhi gutthiyon se,

Karm ka bojh sir par le,

Jaagna hota hai insaan ko,

Daudna padta hai umra bhar,

Aur fir haar jana hota hai ant mein,

Zindagi bahut kasi huyi hai.

Par khwaab,

Use to koi kabhi samajh hi nahi paaya,

Use koi kabhi samajh bhi nahi sakta,

Use bhala koi kabhi samajhna bhi kyun chahe,

Itni aazadi aur shaanti, bhala aur kahaan hain

Aazadi vichaaron ki,

Aazadi kuch na karne ki,

Aazadi kabhi na jaagne ki,

Aazadi kabhi na haarne ki.

Par kisi raat chahe savera ho na ho,

Jaag hi jaata hai insaan

Pataa nahi kaunse dard se,

Pahchaan kar paana bhi mushkil sa lagta hai

Bas itna samajh aata hai, wo jaag gaya

Kyunki use jaagna hota hai,

Aur jaanna hota hai ek aur sach

Sach jo sabko ek kar deta hai.

Bhala zindagi aur khwaab ek hi to hain

Ek din sabka ant ho jaata hai

Aur ant hi to hai sabse badaa sach.

Mujhe ant ki parwaah nahi

Par khwaab, uska kya karun

Wo to fasaana lagta tha

Aaj wo bhi sach nikla

Pahle di kuch aashaayein,

Aur fir toot ke bikhar gaya

Usne bhi diya dhokha aur dard

Kitna sach hai, kitna sahi

Khwaab bhi kitne kase huye hain.