Main yeh nahi hoon!

Aksar jab bhi aate jaate, hain log mujhe kuch batlaate,
Main na kah paaun kuch bhi unhe, par main hoon nahi jo wo jatlaate.

Koi mujhe sundar kahta hai, koi kahe, main hoon buddhimaan,
koi deta hai darzaa mahaan ka, par yeh main nahi, main hoon sirf insaan.

Koi kahta mujhe hai rachnakaar, koi kahe main hoon chitrakaar,
Kai log kahte hain vigyaan ki chhaatra, to kai log kahte hain sirf bekaar.

Nahin samajh sakte wo, mere rango ki udaan,
Mere sapne, mere armaan, ek panchhi ki daastaan.

Nahin samajh sakte wo, mere dil me chhipe jazbaat,
Chaand aur chaandni raat, shamaa aur barsaat.

Nahin samajh sakte wo, mere shabdo ki gahraayi,
Jalti huyi diyasalayi, bheed me bhi tanhaayi.

Nahin samajh sakte wo, kya galat hai, kya sahi,
Kya door hai, kya yahin, kya hoon main, kya nahin.

Maana main nahi hoon, samudra si vishaal,
Parwat si atal, aasmaan si buland.

Maana main nahi hoon, hawaa si mastmaula,
Jharne si chanchal, gulaab si komal.

Main aasmaan bhi nahi, au dharaa bhi nahi hoon,
Had se zyada nahi, par zaraa bhi nahi hoon.

Kaun kahta hai main, duniya me khaas nahi hoon,
Jo pal me toot jaye, main wo vishwaas nahi hoon.

Main aatma hoon, sirf shareer nahi hoon,
Jo kabhi prem na kar paye, wo tasveer nahi hoon.
Mujhe jaanna to itna aasaan nahi hoga,
Par haqikat hoon main, koi takdeer nahi hoon.

Koi kal bhi nahi, koi aaz nahi hoon,
Dil ke taaro se na mil jaye, aisa saaz nahi hoon,
Main yeh bhi nahi, aur weh bhi nahi hoon,
Main sirf "Main" hoon, dafn raaz nahi hoon.